الله يرحمك يا عمر يا نجم

مجري العيون


و طالع و قاصد رب و حنون
و من قلب حاره ف مجرى العيون
لقيتك قصادي
يا شهقة فؤادي
حورية و طالعة بتروي اللمون

ندهتي رمح لك قلبي الصغير
أبو عيون شوارع لمليون فقير
بيسروا ف جوانحي
و بيلموا جرحي
و بيحلوا ملحي و بينهم باكون

من القاعة طالعة و محلا غناكي
يا ميت شمعة والعة ف حضن البواكي
ف حجرك بنام
و بانسى الظلام
و صورتك مقام ما بين الجفنون

انا يا حبيبتي يا دوب لسه عيل
و هم السنين كتير مش قليل
بتدبحني كلمة
و تحيني كلمة
باحبك يا كلمة ما تعرف تخون

تعالي ف حضني نعيد الحياه
تعالي لبكرة مايولدش آه
و حشني الحنين
و زغد الجنين
و من امتى حبلى بيه البطون؟

عمر نجم
15 مايو 1987