ماكنتش تحب اللون الباهت
ماكنتش تحب الميه الفاترة
كانت لما بتكره .. تكره موت
و اما تحب .... تحب صبابة
و اما بتحزن تبقى ربابة
واما بتفرح
يبقى الفرح على البوابة
كانت زي الشمس و كانت
لما بتغضب .. تبقى مهابة
..............
كان ممكن حبل العمر يطول و يطول
و الناقة تشيل مليون محصول
لكن فرق كبير بين موت الموت
و الموت مقتول
..............
كان الله يرحمها و كانت ... كانت دايما تعشق بكرة
رغم الغلب و رغم السخرة ... ماتت قابضةلبكرة الأجرة
رغم البكرة ماجاش م البندر... كانت دايما تصحى تفكر
( هوا يا ولدي القطر اتأخر و لا يا ولدي حاشوه العسكر )
جايز .... يمكن ....ممكن ...جايز
يمكن ييجي ف ضم الغلة
جايز جه و الناس نايميين
يمكن لسه ماجاش و هاييجي
جايز جاي مع الجايين
كانت الله يرحمها...آمين
تمسك ودني وترمي القول
" أنامش عايزةأموت نوبتين....أنا مش عايزةاموت نوبتين "
القصيدة دي انا مش عارف مين اللي كتبها.
انه في تاريخ 28-6-2006 اكتشفت ان اللي كتب القصيدة دى واحد اسمه - زكي عمر
Comments
المهم جامدة اوي لدرجة اني حروح ابوس أمي بسببها
محبتي وتحياتي
:-)
دي مدونه خاصه باعماله
www.zaki-omar.blogspot.com.eg/
ودي صفحه ليه ع الفيسبوك
www.facebook.com/zakiomar.blogspot/?fref=ts&hc_location=ufi